Nasunog ang usa ka guest house building sulod sa Monastery of the Transfiguration sa Purok 4, Barangay San Jose, Malaybalay City, Bukidnon, niadtong gabii sa Enero 6, 2026

Dayong mipadulong sa maong lugar ang mga miyembro sa Malaybalay City Police Station (MCPS) ug MPU Blue, kauban ang duty investigator, aron sutaon ang taho nga ilang nadawat gikan sa security personnel sa maong pasilidad.

Sumala sa report ni Police Lt. Col. Joepet B. Paglinawan, hepe sa Malaybalay CPS, sa pag-abot sa ilang team, anaa na sa lugar ang mga personahe sa Bureau of Fire Protection (BFP) Malaybalay City ug nagpadayon na sa pagdumala ug pagpalong sa kalayo.

Sa imbestigasyon, nasayran nga ang sunog nagsugod sa likod nga bahin sa Saint Joseph Building Guest House, nga nahimutang sulod sa compound sa Monastery of the Transfiguration. Walay gikatahong naangol o namatay sa maong insidente.

Ang inisyal nga gidudahang hinungdan sa sunog mao ang faulty electrical wiring. Sa pagkakaron, nagpadayon ang BFP Malaybalay City sa ilang lawom ug makuting imbestigasyon aron masuta ang eksaktong hinungdan sa sunog ug ang kinatibuk-ang kantidad sa danyos. (melbmadera)