Gumikan sa wala mahipos nga manok hiniktan nga gikasuko sa usa ka 39-anyos nga bana, natigbasan hinuon siya sa iyang 36-anyos nga asawa sa Purok 6, Poblacion, Impasugong, Bukidnon, niadtong gabii sa Enero 21, 2026

Ang biktima gidala sa RHU-Impasugong, apan gibalhin sa Polymedic Hospital sa Malaybalay City alang sa dugang medikal nga pagtambal.  

Nakadawat ang Impasugong Municipal Police Station og tawag sa cellphone gikan sa usa ka lalaki nga nagpahibalo sa gidangatan sa iyang manghod.  

Sumala sa report, mga alas 6:30 sa gabii, miabot ang biktima sa ilang panimalay. Sa dihang iyang namatikdan nga wala gibutang sa hawla ang iyang mga manok hiniktan, nasuko siya ug mibahad sa iyang asawa.  

Mga alas 9:20 sa gabii sa samang petsa, misulay ang biktima sa pagpasakit sa suspek, hinungdan nga mikuha ang suspek og bolo gikan sa ilang kusina ug gitigbas ang biktima sa ulo ug tuo nga abaga.  

Ang bolo nga gigamit sa suspek nakolekta sa lugar sa insidente sa mga niresponde nga pulis.  

Gituohan nga ang hinungdan sa insidente mao ang wala pagsinabtanay. Nadakpan ang suspek ug kasamtangang naa sa kustodiya sa Impasugong MPS alang sa husto nga disposisyon. (melbmadera)