Nagpadayon ang serye sa mga pre-orientation alang sa programang “Valencianos Ayaw sa Droga” isip kabahin sa kampanya sa Dakbayan sa Valencia batok sa ilegal nga droga

Sumala sa Facebook post sa City Government of Valencia, ang kalihokan gipahigayon sa City Anti-Drug Special Unit Team (CADSUT) sa nagkalain-laing barangay, ubos sa direktiba ni City Mayor Azucena “Amie” Galario.  

Gisuportahan usab sa 10th Sangguniang Panlungsod, sa pagpangulo ni Vice Mayor Greizl Galario-Fernandez, ang maong inisyatiba. Kini nagpakita sa panaghiusa sa ehekutibo ug lehislatibo alang sa proteksyon sa komunidad.  

Gipahigayon ang mga pre-orientation sa Barangay Nabag-o niadtong Enero 25; sa Barangay Pinatilan, Poblacion, ug Maapag niadtong Enero 27; ug sa Barangay Bagontaas niadtong Enero 28.  

Pinaagi sa CADSUT, gidasig ang mga Anti-Illegal Drugs Advocates ug mga opisyal sa barangay nga magpabiling aktibo isip “mata ug dunggan” sa komunidad. Gipasiugda usab ang papel sa katawhan sa citizen-based information collection program aron makab-ot ang tumong nga mahimong drug-free ang dakbayan. (pr)