Usa ka 60-anyos nga lalaki ang namatay human makaangkon og duha ka samad-pinusilan sa ulo sa Purok 5, Barangay Danggawan, Maramag, Bukidnon, niadtong buntag sa Enero 26, 2026

Sumala sa report sa Maramag Municipal Police Station, ang duha ka suspek mitungha ug nagpakaron-ingnon nga maghatod og parsela alang sa biktima. Human madawat ang parsela, kalit nga gipusil sa usa sa mga suspek ang biktima, samtang ang ikaduhang suspek nagtion sa iyang armas ngadto sa trabahante sa biktima.  

Wala maigo ang biktima sa unang buto ug nakahigayon pa kini sa pagdagan, apan gisundan siya sa suspek ug gipadayon ang pagpamusil hangtod nga naigo kini sa ulo.  

Ang biktima gidala sa mga personahe sa MDRRMO-Maramag paingon sa BPH-Maramag alang sa dinaliang medikal nga atensyon, apan gideklarar siya nga dead on arrival sa nag-atiman nga doktor.  

Dugang pa, ang Maramag MPS padayon sa masusihong imbestigasyon aron mailhan ang mga suspek, ug nakig-alayon na usab sa SOCO PFU-Bukidnon alang sa pagproseso sa crime scene. (melbmadera)