Usa ka 39-anyos nga mag-uuma ang gipusil-patay samtang naglingkod sa balkonahe sa iyang panimalay sa Sitio Bolo, Barangay Sinuda, Kitaotao, Bukidnon, niadtong buntag sa Enero 26, 2026

Sa wala pa mahitabo ang insidente, naglingkod ang biktima kauban ang usa ka residente sa maong lugar, sa dihang mitungha ang usa ka wala mailhing suspek nga nagsul-ob og berde nga jacket ug dirty white nga shorts.  

Ang suspek nagpakaron-ingnon nga mopalit og energy drink sa sari-sari store sa biktima. Pagkahuman, kalit kining nipusil sa biktima, diin nakaangkon og daghang samad-pinusilan ang naulahi sa nagkalain-laing bahin sa iyang lawas.  

Human sa insidente, nisibat ang suspek pinaagi sa paglakaw padulong sa Sitio Maloos, Barangay Sinuda. Ang biktima dali nga gidala sa iyang pamilya paingon sa Quezon Infirmary Hospital sa Quezon, Bukidnon, alang sa medikal nga atensyon, apan gideklarar siya nga dead on arrival sa nag-atiman nga doktor.  

Sumala sa kasayuran, gituohang panagbangi sa yuta ang hinungdan sa insidente tungod kay ang biktima nalambigit sa proseso sa land recovery batok sa land grabbing. Dugang pa, ang mga personahe sa Kitaotao MPS padayon sa masusihong imbestigasyon aron mailhan ang suspek. (melbmadera)