Malampusong nadala sa kawatan o mga kawatan ang duolan sa ₱800,000.00 nga kantidad sa nagkalain-laing cellular phones gikan sa DM Gadgets and Appliances, nga nahimutang duol sa Bernal Rice Milling, Purok 4, Bernal St., Brgy. Batangan, Valencia City

Sumala sa report sa Valencia City Police Station, nadiskobrehan sa saleslady sa tindahan ang insidente pasado alas 8:00 sa buntag niadtong Enero 23, 2026. Nadawat sa kapulisan ang taho usa ka oras human masuta ang hitabo.

Nadiskobrehan usab sa saleslady nga ang usa ka bahin sa likod nga konkreto nga pader sa establisemento giguba, diin naghimo og lungag nga gituohang gigamit sa suspek o mga suspek isip agianan sa pagsulod.

Sa dugang nga pagsusi sa palibot, napamatud-an nga ang usa ka bahin sa perimeter wall sa silingang Bernal Rice Milling giguba usab ug gihimoan og laing lungag. Gituohan nga gigamit kini sa mga suspek isip unang agianan sa wala pa sila makasulod sa DM Gadgets and Appliances.

Tungod niini, ang tanang units sa kapulisan daling gipailalom sa full alert, ug ang mga intelligence operatives gakatap na aron magsugod sa koordinadong hot pursuit operation alang sa daling pagkaila ug pagkadakop sa mga suspetsado. (melbmadera)