Gisugdan na sa Department of Social Welfare and Development (DSWD) ang validation process alang sa 175 ka benepisyaryo sa programang “Walang Gutom,” base sa datos sa Community-Based Monitoring System (CBMS) ug uban sa suporta sa Lokal nga Pangagamhanan sa Dakbayan sa Valencia

Sumala sa Facebook post sa City Government of Valencia, gipahigayon ang maong validation niadtong Enero 26, 27, ug 28, 2026, sa Valencia City Covered Court.  

Ginahimo ang validation aron masiguro nga ang mga kwalipikadong benepisyaryo mao ang makadawat sa angay nga tabang ug nutrisyon, isip kabahin sa implementasyon sa mga social protection programs sa dakbayan.  

Gipahinumdoman usab ang publiko nga ang mga benepisyaryo sa “Walang Gutom” program sa nasyonal nga kagamhanan mao kadtong mga food-poor households nga giila pinaagi sa CBMS ug validated databases sa DSWD.  

Dili kini open application o walk-in; ang mga sakop sa listahan kontakon pinaagi sa mga Barangay Health Workers (BHWs) o sa City Social Welfare and Development Office (CSWDO).  

Gipadayag nga ang kalihokan natigayon uban ang suporta sa City Government of Valencia, ubos sa liderato ni Mayor Azucena “Amie” Galario, isip kabahin sa paningkamot sa lokal nga pangagamhanan sa pagpalig-on sa mga programa sa nutrisyon ug pagtabang sa mga pamilyang Valenciano. (pr)