MALAYBALAY CITY, BUKIDNON — Isa ka plantasyon sa marijuana nga adunay 321 ka
punoan ang nakaplagan ug gilaglag sa mga otoridad atol sa isa ka operasyon sa Sitio Talahidan,
Barangay Caburacanan, Malaybalay City, Bukidnon niadtong Agosto 6, 2026.

Gipahigayon ang operasyon mga alas-4:20 sa hapon isip kabahin sa nagpadayong Internal
Driven Security Operation/Combat Operation ubos sa Major ISO Oplan “GIBUT,” nga
gipangulohan sa mga intelligence operatives ug personnel sa 1st Bukidnon Provincial Mobile
Force Company (PMFC).
Kauban sa operasyon ang mga personnel sa Malaybalay City Police Station (CPS) ug Bukidnon
Police Intelligence Unit (BUK-PIU).
Gibana-bana sa mga otoridad nga ang nakuhang marijuana adunay kinatibuk-ang market value
nga P64,200, base sa presyong P200 matag punoan.
Gipahigayon dayon ang eradication o uprooting operation sa mga tanom aron mapugngan ang
ilang posibleng paggamit ug pag-apod-apod.
Kabahin usab sa operasyon ang physical inventory sa mga nakuhang tanom, nga gihimo sa lugar
ug gisaksihan ni Barangay Kagawad Romel Seblian, miyembro sa Peace and Order Committee
ug Committee on Education sa Barangay Caburacanan.
Sa 321 ka punoan sa marijuana, 311 niini ang gilaglag pinaagi sa pagsunog sa maong lugar,
samtang 10 ka punoan ang gikuha isip representative samples alang sa laboratory examination.
Ang maong mga sample gidala sa Provincial Forensic Unit sa Malaybalay City alang sa tukmang
forensic ug laboratory examination.
Ang operasyon gipangulohan ni PLTCOL Dave E. Mahilum, force commander sa 1st Bukidnon
PMFC, isip kabahin sa padayong paningkamot sa kapulisan sa pagwagtang sa mga plantation sa
marijuana ug pagsumpo sa ilegal nga droga sa Bukidnon. (melbmadera)