Padayon ang pagpangandam sa Dakbayan sa Valencia alang sa relokasyon sa mga pamilyang
kansang mga panimalay giklasipikar nga totally damaged tungod sa pagbaha niadtong
Septyembre sa miaging tuig.

Atol sa press conference niadtong Hulyo 20, 2026, miingon si City Engineer Rodina Onting nga
ang mga benepisyaryo ibalhin sa relocation site sa Barangay Pinatilan, diin 160 ka pamilya ang
gilaumang makabenepisyo sa programa.
Matud pa niya, ang relocation site sa Barangay Lumbo gitagana alang sa mga pamilyang
naapektuhan sa demolisyon sa Pacoma Site.
Giklaro usab ni Onting nga ang pag-validate sa mga benepisyaryo gihimo sa City Social Welfare
and Development Office (CSWDO) sa koordinasyon sa City Disaster Risk Reduction and
Management Office (CDRRMO), samtang ang opisyal nga listahan sa mga kwalipikadong
benepisyaryo gitipigan sa City Housing Office.
Dugang ni Onting, nahuman na ang paghimo sa mga dalan ug ang pagbahinbahin sa mga lote sa
relocation site sa Barangay Pinatilan. Ang matag lote adunay kadak-on nga 64 square meters.
Samtang, nagpadayon pa ang pagbahinbahin sa mga lote sa relocation site sa Barangay Lumbo.
Gidugang usab niya nga gikatakdang ipahigayon sa umaabot nga semana ang ceremonial signing
ug awarding sa mga lote sa Barangay Lumbo pinaagi sa City Housing Office. Mosunod usab ang
pag-award sa mga lote sa relocation site sa Barangay Pinatilan.
Gipadayag usab ni Onting nga ginaproseso na sa City Government ang housing assistance alang
sa mga kwalipikadong benepisyaryo. Naggahin na usab kini og kapin ₱19 milyon alang sa
construction materials, ug ang pag-award na lamang sa kontrata ang gipaabot aron masugdan ang
pagtukod sa mga balay sa mga benepisyaryo. (melbmadera)