Nadiskubri ug nasakmit sa mga sundalo ang isa ka titaguan nga mga armas nga gituohang
gigamit sa New People’s Army o NPA sa Bukidnon, nga giisip sa militar nga dakong kapildihan
sa nagkahuyang nang kalihukan sa mga rebeldeng komunista sa Northern Mindanao.

Sumala sa report, sa operasyon niadtong Hulyo 4, nadiskubrehan sa tropa sa 88th Infantry
Battalion ubos sa 403rd Infantry Brigade ang isa ka gibiyaang payag sa Sitio Matangpatang,
Barangay Miglamin, Dakbayan sa Malaybalay.
Didto, narekober sa mga sundalo ang isa ka M4A1 Carbine, isa ka caliber .30 Carbine, mga
magasin sa armas, 138 ka bala sa 5.56-millimeter, 48 ka bala sa caliber .30, ug duha ka military
backpack.
Matud ni 4th Infantry Division spokesperson Lt. Col. Joe Patrick Martinez, ang pagkarekober sa
mga tinagong armas nakapugong sa mga rebeldeng komunista sa paggamit niini ug makatabang
sa pagpanalipod sa kaluwasan sa mga komunidad sa maong lugar.
Samtang, giingon ni 403rd Infantry Brigade Commander Brig. Gen. Seigfred Tubalado nga
naputol sa operasyon ang logistics network sa armadong grupo pinaagi sa pagpugong nga
mabawi ug magamit pag-usab ang mga gitagong armas.
Gidayeg usab ni 4th Infantry Division Commander Maj. Gen. Marion Angcao ang mga tropang
miapil sa operasyon ug mipasiugda nga ang padayon nga intelligence-driven operations maoy
yawe aron mapugngan ang pagbangon pag-usab sa mga armadong grupo ug mapadayon ang
kalinaw sa Northern Mindanao. (melbmadera)