KALILANGAN, Bukidnon — Hingpit nga naugdaw sa sunog ang Kalilangan Baptist Christian Academy nga nahimutang sa Purok 2, Brgy. Central Poblacion, Kalilangan, Bukidnon, sa buntag niadtong Disyembre 10, 2025

Sumala sa report ni Police Captain Romeo M. Arcilla, OIC sa Kalilangan Municipal Police Station, nagsugod ang sunog pasado alas 4:00 sa buntag ug nadeklarang fire out pasado alas 5:25 sa buntag, o kapin sa usa ka oras human kini nagsugod.   Unang nakaresponde ang mga personnel sa Kalilangan Fire Station ug daling nakasunod ang team sa Kalilangan MPS.  

 Matod sa report, tungod sa istruktura sa mga bilding sa eskuylahan, nga gilangkuban sa gibana-bana nga 60 porsyento nga light materials ug mga daang tabla, paspas nga naugdaw ang mga istruktura.   Sa imbestigasyon, sa koordinasyon sa BFP-Kalilangan, nasayran nga nagsugod ang sunog sa computer laboratory sa eskuylahan.

Wala dayon namatikdi ang kalayo hangtod nga nidako na kini og maayo.   Ang alarma sa sunog giisa ngadto sa Second Alarm, hinungdan nga ang Acting Fire Marshal sa BFP-Kalilangan nihangyo og dugang mga fire truck gikan sa duol nga mga estasyon. Ang mga fire units gikan sa BFP-Pangantucan, Bukidnon; BFP-Wao, Lanao del Sur; ug BFP-Amai Manabilang, Lanao del Sur, miresponde aron sa pagtabang sa pagkontrolar sa sunog.  

Walay natalang naangol sa hitabo, samtang ang gibanabanang damyos mikabat sa ₱397,590.00. (melbmadera)