Patay na sa dihang nakit-an ang isa ka 82-anyos nga lalaki sulod sa iyang balay sa Purok 3,
Anlugan, Cabanglasan, Bukidnon buntag niadtong Hulyo 21, 2026.

Sumala sa report sa Bukidnon Police Provincial Office (BukPPO), nakadawat og tawag ang
Cabanglasan Municipal Police Station gikan sa isa ka concerned citizen nga nangayo og tabang
human makit-an ang lawas sa biktima. Gilayon nga mitubag ang mga kapolisan aron beripikahon
ang maong report.
Sa inisyal nga imbestigasyon, nasayran nga ang biktima, kinsa nagpuyo nga nag-inusara sa iyang
umahan, nakit-an sa iyang 52-anyos nga pag-umangkon sulod sa balay. Ang lawas sa biktima
anaa na sa advanced state of decomposition sa dihang nadiskubrehan.
Base sa unang pagsusi sa mga imbestigador, adunay mga timailhan nga posibleng adunay foul
play sa nahitabong insidente. Tungod niini, gitawag ang Scene of the Crime Operatives (SOCO)
sa Bukidnon Provincial Forensic Unit aron sa pagproseso sa crime scene ug pagkolekta sa mga
ebidensya.
Atol sa forensic examination, narekober sa mga otoridad ang isa ka sundang ug isa ka
improvised 12-gauge shotgun.
Sumala sa inisyal nga eksaminasyon sa lawas sa biktima, nasuta nga nakaangkon kini og 13 ka
samad tungod sa dunggab sa tuong bahin sa dughan ug isa ka samad sa tuong bahin sa likod, nga
maoy hinungdan sa iyang kamatayon.

Human mahuman ang pagproseso sa crime scene, gitugyan ang lawas sa biktima ngadto sa iyang
pamilya, nga mihangyo usab nga ipailalom kini sa autopsy aron mas masuta ang eksaktong
hinungdan ug paagi sa iyang kamatayon.
Padayon pa ang imbestigasyon sa kapolisan aron matino ang motibo sa krimen ug mailhan ang
posibleng responsable, samtang wala pa usab makaila og saksi nga makahatag og dugang
impormasyon bahin sa insidente. (melbmadera)