Nasikop sa hiniusang operasyon sa kapolisan ug militar ang isa ka 62-anyos nga lalaki nga giila
isip Top 1 Most Wanted Person sa regional level sa Barangay Kulasihan, Lantapan, Bukidnon
alas-1:25 sa hapon niadtong Hulyo 17, 2026.

Giila sa kapolisan ang nadakpan nga si Faustino L. Dairo Jr., minyo, walay trabaho, ug residente
sa maong barangay.

Ang pagdakop gipahigayon sa mga operatiba sa Lantapan Municipal Police Station, 1st
Bukidnon Provincial Mobile Force Company, Bukidnon Provincial Intelligence Unit, Bukidnon
Police Provincial Office, Bukidnon Provincial Intelligence Team ubos sa Regional Intelligence
Unit 10, Regional Detective Team-Bukidnon pinaagi sa Oplan Shield, ug sa 3rd Platoon sa
1004th Maneuver Company, Regional Mobile Force Battalion 10.
Gibase ang pagdakop sa warrant of arrest nga gipagawas niadtong Hulyo 13, 2026 alang sa tulo
ka kaso sa statutory rape ug tulo usab ka kaso sa acts of lasciviousness ubos sa Republic Act
7610, nga giusab sa Republic Act 11648.
Walay piyansa nga gitakda alang sa mga kaso sa statutory rape, samtang P90,000 ang piyansa sa
matag kaso sa acts of lasciviousness.
Ang suspetsado anaa na karon sa kustodiya sa Lantapan Municipal Police Station alang sa
hustong dokumentasyon ug disposisyon. (melbmadera)