Giila ug gipasidunggan ang labing limpyo ug labing berde nga mga barangay sa Malaybalay
City, Bukidnon atol sa programa sa ika-149 ka anibersaryo sa pagkamugna niini isip munisipyo,
nga gihimo kaniadtong Hunyo 13, 2026, sa Bukidnon Cultural and Sports Complex sa Barangay
Laguitas

.

Sa Category A, naghari ang Barangay Simaya isip kampeon sa Cleanest and Greenest Barangay
Awards, gisundan sa Barangay Dalwangan sa ikaduhang puwesto ug Barangay Bangcud sa
ikatulo. Nakadawat usab og consolation prizes ang mga barangay sa Kalasungay, Casisang,
Aglayan, San Jose, ug Managok isip pag-ila sa ilang paningkamot sa pagmintinar sa kalimpyo ug
pag-atiman sa kinaiyahan.
Gipasidunggan usab ang Laguitas Elementary School isip Best Green Program Implementing
School tungod sa malampusong pagpatuman niini sa mga programa alang sa pagpanalipod sa
kalikupan ug pagpalambo sa kahibalo sa kabatan-onan bahin sa pag-atiman sa kinaiyahan.
Sa Category B, nasungkit sa Barangay Kulaman ang labing taas nga dungog, samtang misunod
ang Barangay Imbayao ug Barangay Silae sa ikaduhang ug ikatulong puwesto. Nakadawat usab
og consolation prizes ang Barangay 8, Barangay 4, Miglamin, Barangay 6, ug Sto. Niño.
Samtang, ang Capitan Angel Integrated School ang gihatagan sa titulo nga Best Green Program
Implementing School sa maong kategoriya.
Ang mga mananaug sa Cleanest ug Greenest Barangays gipasidunggan pinaagi sa paghatag og
mga plaque of recognition ug cash incentives alang sa ilang mga environmental projects. Ang
nakadaog sa unang puwesto nakadawat og P100,000, samtang P75,000 ang gihatag sa ikaduhang
puwesto ug P50,000 sa ikatulong puwesto, samtang ang matag usa sa mga nakakuha og
consolation prize sa duha ka kategorya nakadawat og P20,000.
Dugang pa, ang Laguitas Elementary School ug Capt. Angel Integrated School matag usa usab
nga gihatagan og P20,000 nga pondo aron suportahan ang ilang mga inisyatiba ug proyekto
alang sa pagpanalipod ug pagpreserbar sa kinaiyahan.
Ang maong pasidungog kabahin sa padayon nga paningkamot sa lokal nga kagamhanan sa
Malaybalay sa pag-awhag sa mga komunidad ug mga eskwelahan nga mahimong ehemplo sa
pag-atiman sa palibot, aron mapadayon ang usa ka limpyo, himsog, ug malungtarong dakbayan
alang sa umaabot nga mga henerasyon. (melbmadera)