Padayon ang gipakusog nga search and rescue operation aron pangitaon ang usa ka hiker nga
gitaho nga nawala sa Mt. Kalatungan sa lungsod sa Pangantucan, Bukidnon.

Sumala kang Police Major Joann Navarro, spokesperson sa Police Regional Office-10 (PRO-10),
kaniadtong Hunyo 12 pa nawala ang hiker nga si Alkharj Gomez Zamayla. Apan wala kini
dayon mareport sa mga awtoridad tungod kay ang iyang mga kaubang hiker ug mga trail guide
ang unang mihimo og kaugalingong pagpangita sa maong dapit.
Niadtong Hunyo 15 lamang opisyal nga nareport ang insidente sa kapolisan pinaagi sa live-in
partner sa biktima. Human madawat ang report, gilayon nga gilunsad ang search and rescue
operation aron pangitaon si Zamayla.
Sa pagkakaron, ang Philippine National Police (PNP), Philippine Army (PA), ug ubang mga
search and rescue teams nagtinabangay sa operasyon pinaagi sa paggamit og K9 dogs ug mga
drone aron mapadali ang pagpangita sa nawalang hiker.
Gibutyag ni Major Navarro nga dakong hagit sa mga rescuers ang kalapad sa Mt. Kalatungan
mountain range, lakip na ang mabangis ug lisod nga terrain sa kabukiran, ingon man ang dili
paborableng kahimtang sa panahon nga nakapahinay sa operasyon.
Base sa report, miapil si Zamayla sa usa ka trail hiking activity sa Mt. Kalatungan nga nagsugod
sa Barangay Portulin ug padulong sa Barangay Mendis. Niadtong Hunyo 13, mga alas 2:00 sa
hapon, nakadawat og tawag sa cellphone gikan sa iyang ig-agaw nga kauban usab sa hiking ang
grupo, nga nagpahibalo nga nawala si Zamayla sa trail.
Katapusang nakita ang biktima niadtong Hunyo 12 duol sa usa ka sapa nga pipila lamang ka
minutos ang gilay-on gikan sa Camp 1.
Nasayran usab nga si Zamayla walay trekking permit nga gi-isyu sa Tourism Office. Matud sa
tour guide, pag-abot nila sa Camp 1, namatikdan nga dili na normal ang panglihok sa biktima.
Gikabutyag usab niini nga adunay personal nga problema si Zamayla may kalabotan sa pinansyal
nga kahimtang ug nakita pa nga naglakaw kini nga nagtiniil atol sa bahin sa biyahe. (Sean
Sulugan)