Naghiusa ang Philippine Drug Enforcement Agency (PDEA) Bukidnon ug Philippine
Information Agency (PIA) Bukidnon sa pagpalig-on sa kahibalo sa mga kabatan-onan batok sa
peligro sa illegal nga droga pinaagi sa isa ka Drug Abuse Prevention Education (DAPE) lecture
nga gipahigayon sa San Vicente Integrated School, Sitio San Vicente, Barangay Tongantongan,
Valencia City niadtong Agosto 5, 2026

Nagsugod ang kalihokan mga alas-9:30 sa buntag ug gitambongan sa mga estudyante sa Grades
7 hangtod 10, lakip ang mga magtutudlo sa maong eskwelahan.
Ang PDEA Bukidnon, ubos sa pagdumala ni Rodolfo S. De La Cerna Jr., provincial officer, ug
ang PIA Bukidnon nagsilbing resource speakers sa maong kalihokan. Gipunting sa lecture ang
mga peligro sa illegal nga droga, kadaot sa substance abuse, ug ang importansya sa husto ug
responsable nga pagdesisyon sa mga batan-on.
Gipasiugda usab sa PDEA ang nagpadayong mga programa, inisyatibo ug enforcement efforts sa
ahensya aron matubag ang problema sa illegal nga droga sa tibuok Probinsya sa Bukidnon.
Sa iyang welcome address ug inspirational message, gipasiugda ni School Head Rober J. Nahini
ang dakong papel sa edukasyon, disiplina ug lig-on nga mga prinsipyo sa pagpanalipod sa
kabatan-onan batok sa daotang epekto sa illegal nga droga.
Gidasig usab niya ang mga estudyante nga mahimong responsable nga mga indibidwal ug
aktibong kauban sa pagtukod og luwas ug lig-on nga komunidad.
Samtang, ang mga personnel sa PIA Bukidnon mitambong isip resource speakers isip kabahin sa
ilang revalida human sa ilang Drug Abuse Prevention Education Training of Trainers (TOT).
Napakita nila ang maayong kahibalo, propesyonalismo ug pagsalig sa paghisgot sa mga
hilisgutan nga may kalabotan sa drug abuse prevention.
Gipahayag sa PDEA Bukidnon nga magpadayon kini sa pag-edukar sa kabatan-onan ug
pagpalig-on sa pakigtambayayong sa mga eskwelahan ug nagkadaiyang ahensya sa gobyerno sa
kampanya batok sa illegal nga droga.
Pinaagi sa padayong information ug awareness campaigns, gilauman nga mas daghang kabatan-
onan ang mahimong responsableng mga indibidwal ug mahimong kabahin sa positibong
kausaban padulong sa usa ka drug-free nga Bukidnon. (melbmadera)