Gidasig sa Provincial Veterinary Office (PVet) ang tanang Municipal Agriculturist ug City
Veterinarians sa mga Local Government Unit (LGU) sa probinsya nga pahugtan ang surveillance
sa mga binuhing baboy aron malikayan ang posibleng hulga sa transboundary animal diseases.

Sumala sa Facebook Post sa LGU Bukidnon, ang panawagan gihimo atol sa panagtigum sa
Bukidnon Livestock Extension Workers (BLEW) niadtong Agosto 11, 2026, subay sa Technical
Advisory No. 1, s. 2026.
Gihatagan og gibug-aton sa PVet ang panginahanglan sa padayong kooperasyon sa mga LGU ug
tukmang pag-report sa bisan unsang dili normal nga kahimtang o clinical signs nga makita sa
mga hayop, ilabina sa mga baboy.
Lakip usab sa mga gihisgutan sa maong panagtigom ang mga proposed resolution sa Provincial
Beef Cattle Council, umaabot nga animal health activities, accomplishment reports, ug uban
pang mga programa ug kalihokan alang sa pagpalambo ug pagpanalipod sa industriya sa
kahayupan sa probinsya.

Pinaagi sa mas hugot nga surveillance ug paspas nga pag-report sa mga kahimtang sa mga
hayop, gilauman nga mas mapalig-on ang mga lakang sa paglikay ug pagkontrol sa posibleng
pagkaylap sa mga sakit sa kahayupan. (melbmadera)