Mibalor sa P5.7 milyon nga livelihood grants ang gipanghatag sa Department of Social Welfare
and Development Field Office 10 o DSWD-10 ngadto sa 19 ka People’s Organizations sa
Bukidnon niadtong Agosto 12 hangtod 13, 2026, isip kabahin sa programa sa gobyerno alang sa
kalinaw, kalamboan ug panginabuhian.

Gigun sa kasayoran gikan sa DSWD 10, gipatuman ang paghatag sa pondo ubos sa PAMANA
LGU-Led initiative sa Peace and Development Buong Bansa Mapayapa o PDBBM Program,
diin ang matag benepisyaryong organisasyon nakadawat og P300,000 nga Livelihood Seed
Capital Fund alang sa pagtukod o pagpalapad sa ilang community enterprises.

Gipangulohan ang programa ni PDBBM Regional Program Coordinator Atty. Edgar G.
Requilme, uban sa program team sa DSWD-10, atol sa serye sa turnover activities sa duha ka
lungsod sa Bukidnon.
Sa Impasugong, napulo ka asosasyon ang nakadawat og hiniusang P3 milyon nga pondo,
samtang siyam ka asosasyon sa Pangantucan ang nakadawat og total nga P2.7 milyon.
Gilauman nga pinaagi sa maong livelihood assistance, mas mapalambo sa mga benepisyaryong
grupo ang ilang mga panginabuhian, madugangan ang kita sa mga panimalay ug mapalig-on ang
kapasidad sa mga komunidad sa pag-atubang sa mga hagit sa panginabuhian.
Dili lamang pinansyal nga tabang ang ihatag sa programa, tungod kay magpadayon usab ang
DSWD Field Office X ug mga multi-sectoral partners sa pagmonitor sa mga livelihood projects
ug paghatag og capacity-building assistance aron masiguro ang ilang kalungtaran ug
kalampusan.
Pinaagi niini, gilauman sa DSWD-10 nga ang mga community enterprises mahimong dugayng
tinubdan sa kita ug oportunidad sa panginabuhian alang sa mga benepisyaryo ug ilang mga
komunidad. (melbmadera)