Nadakpan sa kapolisan ang isa ka 30-anyos nga lalaki human giingong misulay pagpatay sa
iyang kaugalingong inahan ug miguba sa duha ka motorsiklo sa Barangay Minsalirac, Quezon,
Bukidnon niadtong Agosto 13.

Sumala sa report Police Lt. Col. Erwin R. Naelga, chief of police sa Quezon Municipal Police
Station, nahitabo ang insidente pasado alas 9 sa gabii sa Purok 3, Minsalirac, diin ang suspek,
nga giingong nakainom pag-ayo, misulay paghapak sa ulo sa iyang 49-anyos nga inahan gamit
ang bato.
Apan tungod sa pag-abot sa mga barangay tanod, napugngan ang suspek sa iyang gibuhat.
Hinuon, natandog ang tuo nga tiil sa biktima ug nakaangkon kini og samad.
Human niini, nahimong mas bayolente ang suspek ug iyang giadto ang duha ka motorsiklo nga
giparking nga walay nagbantay, ug gipanghapak kini gamit ang bato.
Lakip sa nadaot ang Kawasaki Bajaj motorcycle nga gipanag-iya sa iyang manghod ug Honda
Click nga iya usab sa laing manghod. Parehong nakaangkon og kadaot ang duha ka motorsiklo,
apan wala pa matino ang eksaktong kantidad sa damage ug gipa-estimate pa kini sa eksperto o
mekaniko.
Gidakop dayon sa mga barangay tanod ang suspek ug gidala ngadto sa Quezon Municipal Police
Station, diin anaa na siya karon sa kustodiya sa kapolisan alang sa hustong disposisyon ug pag-
atubang sa kaso nga attempted parricide ug duha ka counts sa malicious mischief.
Gidayeg ni Police Col. Oliver S. Navales, provincial director sa Bukidnon Police Provincial
Office ang mga responding police personnel ug barangay tanod sa ilang dali nga pagresponde,

samtang gipasiugda ang kamahinungdanon sa kooperasyon sa komunidad aron mapadayon ang
kalinaw ug seguridad sa Bukidnon. (melbmadera)