MALAYBALAY CITY, Bukidnon — Gisuportahan sa Regional Development Council sa
Northern Mindanao o RDC-10 ang planong pagtukod sa isa ka expressway nga pondohan sa
China ug motuhop sa Bukidnon aron magkonektar ang Cagayan de Oro City ug General Santos
City.

Isa kini sa mga gipadayag ni Bukidnon Governor Rogelio Neil Roque atol sa Kapihan ug
culmination activity sa 4th Media Week celebration sa Bukidnon kaniadtong Agosto 28, 2026, sa
D Gardens ning dakbayan.
Matod ni Roque, nga chairperson usab sa Infrastructure and Utilities Development Committee sa
RDC-10, gitumong ang expressway sa pagpaayo sa konektibidad ug pagpagaan sa trapiko,
ilabina sa pagbiyahe sa mga produkto gikan sa agricultural areas padulong sa dagkong merkado.
Gilauman usab nga maminusan ang travel time ug transportasyon sa mga produkto sa agrikultura
sa higayon nga matukod ang maong expressway.
Apan wala pa matino ang eksaktong kantidad sa pondo ug target nga petsa sa pagkompleto sa
proyekto tungod kay nagpadayon pa ang pagplano ug proseso alang sa gikinahanglang
congressional approvals.
Atol sa ikatulong quarter meeting sa RDC-10 niadtong Agosto 25, gipasiugda ni Roque ang
panginahanglan sa praktikal ug solution-oriented nga mga lakang aron adunay klarong direksyon
ug konkretong aksyon sa pagpalambo sa rehiyon. (Melbmadera)