Gidayeg ni Bukidnon Governor Rogelio Neil P. Roque ang padayon nga suporta sa Department
of Trade and Industry (DTI) pinaagi sa Rural Agro-enterprise Partnership for Inclusive
Development and Growth (RAPID Growth) Project sa pagpalambo sa imprastraktura nga
makatabang sa mga coffee farmers sa probinsya

Ang gobernador mipahayag niini atol sa Project Demonstration Visit niadtong Hulyo 17, 2026 sa
Barangay Pigtauranan, Pangantucan, Bukidnon, diin gisusi ang implementasyon sa isa sa mga
proyekto nga gipondohan sa International Fund for Agricultural Development (IFAD).
Sentro sa pagbisita ang 1.20-kilometrong farm-to-market road (FMR) sa Sitio Roque-Lantawan,
Barangay Pigtauranan, nga adunay kinatibuk-ang pondo nga ₱33.33 milyon. Ang proyekto

gipondohan pinaagi sa RAPID Growth Fund, samtang kapin ₱4.8 milyon ang equity nga gihatag
sa Lokal nga Gobyerno sa Pangantucan.
Matud ni DTI-Bukidnon Provincial Director Famelah Racquel Villanueva, ang Project
Demonstration Visit kabahin sa monitoring ug evaluation nga gihimo sa International Fund for
Agricultural Development (IFAD), uban sa Department of Economy, Planning, and Development
(DEPDev) ug Department of Finance (DOF), aron masiguro nga husto ang implementasyon sa
mga proyekto nga gipondohan sa programa.
Gipasabot niya nga gisusi usab sa mga evaluators kon ang proyekto nagpatuman sa market-
driven approach, nga nagtumong sa pagpalig-on sa agricultural value chain ug paghatag og mas
maayong oportunidad sa merkado alang sa mga mag-uuma.
Ang maong farm-to-market road gilauman nga makapadali sa pagbiyahe sa mga mag-uuma ug sa
pagdala sa ilang mga produkto ngadto sa merkado, ilabina sa mga miyembro sa Bayanihan
Millennium Multi-Purpose Cooperative, nga giila isip usa sa mga agricultural hubs ubos sa
RAPID Growth Project.
Sumala sa Provincial Government, ang maong inisyatibo kabahin sa padayon nga paningkamot
sa gobyerno ug sa mga development partners sa pagpalig-on sa sektor sa agrikultura pinaagi sa
pagpauswag sa imprastraktura, pagdugang sa kita sa mga mag-uuma, ug pagpalambo sa
ekonomiya sa mga kabaryohan. (melbmadera)