Gikoronahan isip Overall Champion ang lungsod sa San Fernando, Bukidnon sa 6th Provincial
Rescue Olympics nga gipahigayon sa Kaamulan Park, Malaybalay City, Bukidnon gikan Hulyo
13 hangtod 17 isip kabahin sa pagsaulog sa National Disaster Resilience Month

Nakadawat ang San Fernando og ₱100,000 nga cash prize, samtang ang Maramag nahimong
Overall 1st Runner-up ug nakadawat og P80,000, samtang ang Malitbog nga Overall 2nd
Runner-up nakabitbit og P60,000.
Gipahigayon sa Provincial Government of Bukidnon pinaagi sa Provincial Disaster Risk
Reduction and Management Office (PDRRMO) ang lima ka adlaw nga kompetisyon aron
mapalig-on ang kahandam, teknikal nga kahanas, ug koordinasyon sa mga emergency responders
gikan sa 20 ka lungsod ug duha ka component cities sa probinsya.
Atol sa awarding ceremony, giingon ni Governor Rogelio Neil P. Roque nga ang Rescue
Olympics dili lamang isa ka kompetisyon kondili isa usab ka paagi sa pagpalambo sa kahibalo
ug kahanas sa mga responder aron mas epektibo nilang mapanalipdan ang kinabuhi ug kabtangan
sa katawhan panahon sa mga kalamidad.
Sa individual event, midaog ang Malitbog sa Mountain Search and Rescue ug Vehicular
Accident Rescue Challenge, ang Cabanglasan sa Firefighting Mixed Combat Challenge, ang
Maramag sa High Angle (Rope) Rescue, ug ang Valencia City sa Water Search and Rescue. Ang
matag kampiyon nakadawat og ₱70,000 nga cash prize, P50,000 sa ikaduhang puwesto ug
P30,000 sa ikatulong puwesto. (melbmadera)