Gidakop ang isa ka kanhing kumander sa New People’s Army (NPA) nga kasamtangang anaa sa kustodiya sa police mobile force unit sa Don Carlos, Bukidnon, tungod sa kalapasan sa Republic Act No. 9851, o ang Philippine Act on Crimes Against International Humanitarian Law, Genocide, and Other Crimes Against Humanity

Sumala sa report ni Police Lt. Col. Alfredo G. Ortiz, force commander sa 2nd Bukidnon Mobile Force Company nga nakabase sa Brgy. Pinamaloy, Don Carlos, na-serve ang warrant of arrest batok sa suspek sa buntag sa Oktubre 6, 2025.

Ang dinakpan giila nga si alyas “Nico/Balaudo/Nilo Balaodo/@Tonying/Gon,” 29-anyos, minyo, ug isa ka laborer.

Siya mao ang kanhing ABE Team Leader sa Squad 2, Guerilla Front (GF) 6, Sub-Regional Committee sa North Central Mindanao Regional Committee (NCMRC).

Gawas niini, nagsilbi usab siya kaniadto isip Squad Leader sa Squad 2, GF6; Vice Commanding Officer sa GF Malayag; ug Commanding Officer sa SYP2 (LAHAR), GF6 (Coy Thunder), PSRL.

Ang suspek nag-atubang sa kaso kalabot sa paglapas sa RA 9851, ubos sa Criminal Case No. R-CDO-21-03229-CR, pinetsahan Enero 17, 2022, nga walay girekomendang piyansa.

Human sa operasyon, gidala ang nadakpan sa Don Carlos Municipal Police Station (MPS) alang sa dokumentasyon, ug karon anaa sa kustodiya sa Bukidnon 2nd Provincial Mobile Force Company (PMFC) alang sa pagsang-at ug pag-apruba sa Motion for Immediate Custody sa korte. (melbmadera)