Gipirmahan sa Provincial Government of Bukidnon (PGB) ug sa Department of Information and
Communications Technology (DICT) ang Deed of Donation and Acceptance (DODA) alang sa
pagpalig-on sa digital transformation sa sektor sa panglawas sa probinsya.

Sumala sa kasayoran sa LGU Bukkidnon, ang kasabutan gipirmahan ni Bukidnon Governor
Rogelio Neil P. Roque ug DICT-10 Regional Director Sittie Rahma V. Alawi niadtong Hulyo 21,
2026 sa Centennial Stage, Kaamulan Park, Malaybalay City, Bukidnon.
Gisaksihan ni Provincial General Services Office (PGSO) Department Head Atty. Nestor E.
Cajes Jr. ang pagpirma sa DODA nga naglangkob sa donasyon sa kinatibuk-ang 105 ka tablet
alang sa probinsya.
Sa maong gidaghanon, walo ka tablet ang ihatag ngadto sa mga Rural Health Units (RHUs),
samtang 97 ka tablet ang ipanghatag sa mga Barangay Health Workers (BHWs).
Gipahigayon usab ang ceremonial turnover sa mga tablet nga donasyon sa DICT ug sa United
Nations Development Programme (UNDP), uban sa pagtambong ni Cabanglasan Mayor Bernie
Castillanes.
Sumala sa DICT, gamiton ang mga tablet aron mapalambo ang pagdumala sa health information,
mapahapsay ang paghatag og serbisyo panglawas, ug mapalig-on ang kahandam sa mga health
workers sa panahon sa mga kalamidad.
Ang maong inisyatibo kabahin sa Connectivity, Capability, and Resiliency through Free Wi-Fi
for All Project sa DICT, nga nagtumong sa pagpalapad sa digital connectivity ug pagpauswag sa
paghatag og mga batakang serbisyo publiko pinaagi sa teknolohiya. (melbmadera)