Duha ka lalaki ang gipamusil patay sa Purok 7, Brgy. Vintar, Valencia City, Bukidnon hapon sa Setyembre 10, 2025

Sa report ni Police Lt. Col. Bryan M. Panganiban, hepe sa Valencia City Police Station (VCPS), nasayran nga ang duha parehong 45-anyos ug mga residente sa Sityo San Roque, Brgy. Kahapunan sa maong dakbayan.

Napakita sa imbestigasyon nga ang mga biktima nagbiyahe sa national road sakay sa usa ka pula nga Honda Click nga motorsiklo padulong sa kasikbit nga munisipyo, ang San Fernando, Bukidnon.

Kalit silang gipusil sa wala masayring gidaghanon sa mga suspetsado, nga niresulta sa ilang hinanaling kamatayon gumikan sa grabeng mga samad pinusilan nga ilang naangkon.

Nangayo ang Valencia CPS og tabang gikan sa Provincial Forensic Unit sa pagproseso sa crime scene.

Padayon gihapon ang follow-up investigation alang sa posibleng pag-ila ug pagdakop sa mga suspetsado. (Omar Rashid Z. Abdullah)