Napatay ang usa ka giingong hitman sa Bukidnon nga nailhan sa alyas nga “Johnny” ug ang iyang kauban nga security guard, human sila misukol sa kapulisan atol sa usa ka operasyon sa buntag niadtong Disyembre 30, 2025, sa ilang hideout nga nahimutang luyo sa sementeryo sa Purok 1, Barangay Vintar, Valencia City, Bukidnon

Sumala sa report ni Police Lt. Col. Bryan M. Panganiban, hepe sa Valencia City Police Station, magsilbi unta og mga warrant of arrest ang mga kapulisan batok kang Alyas Johnny, kinsa residente sa San Fernando, Bukidnon. Apan, misukol ang suspek ug ang iyang kauban, hinungdan nga miresulta kini sa usa ka engkuwentro.

Si Alyas Johnny gikonsiderar nga usa sa Top 3 Most Wanted Persons sa regional level sa kapulisan. Siya nag-atubang og duha ka kaso sa murder, duha ka kaso nga may kalabutan sa illegal drugs, ug usa ka kaso sa attempted murder.

Gitudlo usab siya isip suspek sa pipila ka mga shooting incident nga natigayon sa San Fernando, Valencia City, Cagayan de Oro City, ug sa ubang dapit sa probinsya sa Bukidnon.(melbmadera)