Ang magtiayon nga nangahoy aron makakwarta alang sa pagpalit og mga school supplies sa
ilang anak naapil sa usa ka makalilisang nga insidente diin ang asawa namatay ug ang bana
nasamdan human sila maalaan ug mapusilan sa mga sakop sa kasundalohan sa kabukiran sa
Malaybalay City, Bukidnon

Sumala sa report sa 101.7 XFM Bukidnon, ang mga biktima residente sa Sityo Mahayag,
Barangay St. Peter, Malaybalay City. Ang nalambigit sa insidente mga sakop sa 88th Infantry
Battalion sa Philippine Army.
Sa eksklusibong pakighinabi sa XFM News Team, gibutyag ni 88IB Commander Lt. Col. Arnold
Bautista nga ang mga sundalo nga nalambigit sa insidente gikan sa Forward Operating
Detachment nga nahimutang sa utlanan sa Bukidnon ug Agusan. Matod niya, nasugat sa mga
tropa ang grupo nila Nenita Buscada ug nakamatikod sila og usa ka butang nga ilang gituohang
armas nga susama sa M14 rifle nga adunay scope.
Dugang ni Bautista, naka-alerto ang mga sundalo tungod kay kaniadtong 2024 adunay mga
sakop sa militar nga naambush sa maong lugar, ug adunay usab duha ka magkasunod nga
engkwentro sa Barangay Busdi sa milabayng mga adlaw. Tungod niini, giingon niyang wala
usab nagpahibalo ang grupo sa mga biktima nga mosulod sila sa maong bahin sa lasang.
Samtang, sumala sa report, gitabangan sa kasundalohan ang pamilya pinaagi sa pag-asikaso sa
lawas sa namatay nga si Nenita Buscada ug gipasalig nga ihatag ang gikinahanglang suporta ug
tabang alang sa pamilyang nabyaan sa maong trahedya. (melbmadera)