Gipahigayon pag-usab kaniadtong Agosto 20, ang Kadiwa ng Pangulo sa Kaamulan Park,
Malaybalay City, Bukidnon, aron makahatag og mas barato ug direktang access sa mga batakang
panginahanglanon sa mga konsumante.

Sumala sa pahibalo sa LGU Bukidnon, apil sa gibaligya sa maong kalihokan ang P20 kada kilo
nga bugas, nga gitumong sa pagtabang sa mga pamilyang nagtinguha nga makapalit og bugas sa
mas ubos nga presyo.

Gipangulohan ang Kadiwa ng Pangulo pinaagi sa Provincial Agriculture Office, uban sa
pakigtambayayong sa mga pribadong partner ug lokal nga mga producers.
Gihatagan og prayoridad sa programa ang mga senior citizen, persons with disabilities o PWDs,
solo parents, indigent households, mga miyembro sa 4Ps, mangingisda ug mag-uuma, ingon man
mga drayber sa multicab, tricycle ug motorela.
Apil usab sa mga prayoridad nga benepisyaryo ang mga minimum wage earners, mga
magtutudlo ug non-teaching personnel sa Department of Education o DepEd.
Ang mga kwalipikadong benepisyaryo nga gustong makapalit sa P20 nga bugas ug uban pang
produkto nagdala sa gikinahanglang mga dokumento ug valid identification card alang sa
hustong pag-verify.
Gawas sa bugas, ibaligya usab sa Kadiwa ang preskong mga utanon, processed foods ug uban
pang lokal nga produkto nga gihimo, giproseso ug gipatubo sa mga mag-uuma ug producers sa
Bukidnon.
Pinaagi sa maong kalihokan, gilauman nga mas mapaduol sa mga konsumante ang barato ug
kalidad nga mga produkto, samtang direktang masuportahan ang mga lokal nga mag-uuma ug
producers sa probinsya. (melbmadera)