Saturday, February 22, 2025

Tag: BPH

Lalaki gidunggab sa asawa sa Damulog

Posted on by Omar Rashid Z. Abdullah

Gidala sa hospital ang 63-anyos nga lalaki human gidunggab sa iyang 62-anyos nga asawa sa buntag sa Enero 23, 2025, sa Purok 9, Poblacion, Damulog, Bukidnon

Sumala sa report ni Police Captain Nilo C. Maderse, OIC sa Damulog Municipal Police Station, usa ka concerned citizen sa Damulog Public Market ang nitaho sa insidente ngadto sa buhatan sa kapolisan.

Ang pasiunang imbestigasyon nagpadayag nga ang usa ka panaglalis tali sa biktima ug ang suspek niulbo sa mainit nga komprontasyon tungod sa pangabugho. Atol sa ilang panaglalis, ang suspek nikuha og kutsilyo gikan sa kusina ug gidunggab ang biktima, nga nasamdan sa wala nga bahin sa dughan ug sa duha ka tuhod.

Ang biktima gidali pagdala sa Bukidnon Provincial Hospital sa Kibawe, Bukidnon (BPH) ug karon anaa sa lig-on nga kahimtang.

Ang mga responding police officer nakadakup sa suspek ug kasamtangan anaa siya sa kustodiya sa Damulog MPS. (Omar Rashid Z. Abdullah)

Babaye gipusil sa Maramag

Posted on by Diego M. Hidalgo

Dideklarang patay na sa wala pa makaabot sa Bukidnon Provincial Hospital (BPH) Maramag ang 46-anyos nga babaye human gipusil sa Purok 8, Brgy. San Miguel, Maramag, Bukidnon hapon sa Enero 10, 2025

Ang babayeng biktima usa ka minyo, mag-uuma, ug residente sa Purok 4, Brgy. San Carlos, Maramag, Bukidnon.


Sumala sa kasayoran sa kapolisan sa Maramag, ang biktima sakay sa multicab pickup-type nga gimaneho sa usa ka lalaki ug uban sa laing babaye.


Ang sakyanan nagdagan gikan sa BUSCO, Quezon, Bukidnon padulong sa Purok 4, Brgy. San Carlos, Maramag, Bukidnon.


Sa ilang pag-abot sa dapit sa nahitaboan, giingong gipusil ang biktima sa duha ka wala mailhing lalaki nga suspek.


Ang biktima nakaangkon og grabing samad tungod sa pinusil sa likod ug gidala kini sa ospital apan patay na sa wala pa makaabot.


Ang mga suspek giingong niikyas human sa krimen sa wala masayri nga direksyon.


Narekober sa lugar sa nahitaboan ang duha ka fired cartridge cases sa kalibre .45 ug sulod sa sakyanan nakaplagan usab ang duha ka bala nga wa pa matinong kalibre.


Ang Maramag MPS nagpadayon sa imbestigasyon aron mailhan ang mga suspek ug masuta ang motibo sa maong insidente. (Diego M. Hidalgo)

Digitalization sa provincial hospital gipangandaman sa PGB

Posted on by cmn

Gipangandaman sa Provincial Government of Bukidnon (PGB) ang digitalization sa Bukidnon Provincial Hospitals (BPH)

Sumala sa kasayoran sa buhatan sa Gobernador, ang pagpangandam gipangunahan sa Provincial Economic Enterprise Development and Management Office (PEEDMO).

Nag-andam sila sa workshop alang sa pag-inventory sa hospital information technology infrastructure ug ang gisugyot nga pag-upgrade niini alang sa digitalization nga gikinahanglan sa provincial hospitals.

Tumong niini nga mas mapalambo pa ang paghatag og serbisyo sa katawhan.

Ang panaghisgot gipasayon sa PGO-Provincial Information and Communication Technology niadtong Enero 19, 2024 sa PICTD Office, PEEDMO Building, Kaamulan Park, Malaybalay City.

Nahisgutan usab ang pag-update sa gi-implementar nga Integrated Hospital Operation and Management Information System sa matag hospital.

Lakip niini ang BPMC, BPH Maramag, San Fernando, Talakag, Manolo Fortich, Malitbog, Kibawe ug Kalilangan. (melbmadera)